PENZI LA WEMA NA IDRIS KUZALIWA UPYA?

Penzi lililokufa kwa zaidi ya mwaka mmoja uliopita kati ya msanii wa komed Tanzania Idriss Sultan pamoja na mrembo wa Tanzania mwaka 2006 Wema Sepetu, huenda likazaliwa upya baada ya wawili hao kuanza mazungumzo kiaina kupitia mitandao ya kijamii.

Mazungumzo hayo yameibuka ikiwa ni siku moja imebaki kuelekea siku ya uzinduzi wa ‘brand’ mpya ya kibiashara ya Idriss ijulikanayo kama Sultan X Foremen, inayotarajiwa kuzinduliwa rasmi kesho Agosti 20, 2017.

Kuelekea siku hiyo, Wema Sepetu kupitia mtandao wa Instagram, ameibuka na kumpongeza Idriss kwa hatua hiyo, huku akiweka wazi kuwa hawezi kuficha hisia zake na kumwagia misifa kwamba ubora ndicho kitu pekee kinachomtambulisha mpenzi wake huyo wa zamani.

Saa chache baada ya ujumbe huo, Idriss naye akatoa neno akionesha kushangazwa na mtu ambaye hakuwa na mawasiliano naye kwa muda mrefu kuibuka na kuanza kumpongeza, lakini akawataka watu wasishtuke kwa kuwa Wema ni mke wake na mke huwa haachwi hata aolewe na mwanaume mwingine.